رسالة الى البحر
خلاص يا بحر
انا مليت من لونك
ومن كذبك
ومن امواجك المجنونه
مثل الايد تخنقني
خلاص ارجوك
اتركني ...ارحمني
يا ساكن فوق
صدري وكاتم انفاسي
يا نايم داخل احساسي
تطيح بلحظة الغيبوبه
من راسي لكراسي
ولا اقدر انا امنعك
ولا امنع نفسي تتغنى
بحروف اسمك
يغافل عن عذابي
كيف تسجني
وتتبسم مثل جلاد في ايده موت
دمه بارد وهادي
وانا انادي مثل نورس
غرق من جوعه ويأسه
خلاص ارحل
من اوراقي من اعماقي
من الدمعة السجينه
داخل احداقي
واذا بترجع
ابيك تكون بحر ثاني
بحر اصفر بحر اخضر
بحر يمسك ورود ويرفض
الاصداف ويتعطر
بحر ما يزورني بكثرة
واذا حن وعشق يكره
ويموت اليوم
لجل اعيش انا بكره
تحياتي
صديقك رشدي الغدير
من البحر
الى رشدي الغدير
بعد التحيه :
يا أناني ..
ياشاعر من ورق
ولا أدري شلي
في أشكالك بلاني
كبرت وصرت تتمرد على أصحابك
تبيني أطلع من أنفاسك
بعد ماكانوا أسلافك يحبوني
ويهدوني القرابين الثمينه
فدوه لعيوني*
تجيني إنت
يا صعلوك
تقول أرحـــــل..!!
تقول..
اخرج من أوراقي..!!
تعلق عجزك وضعفك
على أمواجي
لا.. وتبيني أصير
بحر أصفر ..
وأمسك ورد وأتمختر
وأغني لك وأرقص لك ...
يا تافــــه يافاضـــي
أنا يكفيني مافيني
من الريح اللي تعبث في عناويني ...
ومن الشمس اللي تجلدني وتكويني.. وتزيد الملح في ملحي
وأنا أضحي وأضحي
با أطفالي بأسماكي وأصدافي .. لجل أبقى بحر يصافح أعيونك
تجي الحين تقول مليت من لونك ..؟؟
حســـــافه بس يا رشدي .. بعد مابحت لك بالسر
لكن لا وألف لا .......
أنا اقسم .. بكل وحوشي
السهرانه في عيني
بملحي وحزني وطيني ..
وبعظام وجماجم اللي حبوني
أبــــد ما صادق في عمري بشر ثاني
.. ولو حسيت بالغربه اوالوحده
بتحمل وببقا بحر من ملح ملح وبس
أقبل تحياتي يارشدي الغدير ..
صديقك الســـــــــــــابق..
ليست هناك تعليقات:
إرسال تعليق